الأربعاء , سبتمبر 20 2017
الرئيسية / تحقيقات / مريم الاولى على الثانوية العامة  القانعة الراضية تمنيت ان تكون احدى بناتى | الشارع يوز
مريم الاولى على الثانوية العامة  القانعة الراضية تمنيت ان تكون احدى بناتى

مريم الاولى على الثانوية العامة  القانعة الراضية تمنيت ان تكون احدى بناتى | الشارع يوز

كتب / درى موسى
تمنيت انا كاتب هذه السطور ان تكون لدى مريم كابنه
تمنيت ان يكون بمصر آلاف مريم
مريم بنت بمليون شاب
الفتاه التى صفعت المجتمع وشباب المراهقين على وجوههم بقسوه .
مريم الجميلة الرائعة .
من اوائل الثانويه العامه 99% .
مريم كانت ضيفة حلقة معتز الدمرداش.
مريم والدها حارس عقار
انا خرجت من اللقاء مع معتز الدمرداش بالكثير من الرسائل .
رسائل من البنوته اللى كانت بتتكلم بكل تلقائيه وحب ورضا وقناعة وسعاده ..
رسائل لعل ربنا بعتها جايز تفوق عقول او تنقذها
1- مريم فخوره – مريم وقفت قالت للكل ابويا حارس عقار.
للمدرسين وسكان العماره
واصحابها لما اتعمل معاهم لقاء قالوا كانت بتتعمد تجيب ابوها وتقولنا دا ابويا وشغلته حارس عقار.
2- امبارح طول الحلقه اى كلام عن نجاحها تقول ربنا وامى وابويا.
ولا مره خلال حلقه استمرت اكتر من ساعتين قالت كلمة أنا .
دايما ابويا وامى .
3- الحلقة احدى سكان العماره اللى والدها حارس لها اتصلت بمعتز الدمرداش .
الست كانت مبسوطه اوى وبتقوله انا من زمان وانا بقولها يا دكتوره مريم .
كنت عارفه انها هتبقى دكتوره .
دى كانت رساله ان لسه في بشر فى مصر بتتعامل بالانسانيه لسه مابقيناش كلنا بنبص نظرات التعالى 
واللى راكب عربيه عاوز يدوس على خلق الله
واللى معاه فلوس حاسس انه اشترى الكل بفلوسه.
لسه فى ناس محترمه وشبعانه 
4- ايوه مريم كانت القشه اللى قصمت ظهر الحمير مش البعير.
لان مريم امبارح قالت انها قاعده هى ووالدها ووالدتها و اربع اخوات بنات فى اوضه وانها عشان تعرف تركز فى المذاكره كانت بتذاكر فى محل بتروح تقعد فى محل مقفول عليها وتذاكر .
ولما معتز سألها انتى كنتى بتقدرى تذاكرى رغم ظروفك دى ؟
ردت قالتله ظروف ايه؟! .. انا ماعنديش ظروف 
الحمد لله انا احسن من غيري وماكانش فى اللى يعطلنى عن مذاكرتى .
سطرين الرضا والقناعة دول كانوا بمثابة صفعه على وش كل شاب فى نفس سنها وعمال يشتم ويندب على حاله رغم انه طول السنه بيذاكر تحت التكييف وعلى سرير وجنبه العصير وبياخد دروس وفى الاخر يرسب.
5- الصفه التانيه 
هى كانت نفس الرساله اللى قالتها مريم بدون قصد 
واللى بسببها برضو صمم الفنان محمد صبحى يعمل مكالمه
لما مريم قالت انا ماعنديش فيس بوك ولا تويتر ولا واتس 
معايا تليفون بيقول الو بس عشان اطمئن بابا عليا
ودخل محمد صبحى قال لمعتز ..امسك فى النقطه دى .
نجحت لان مفيش فيس بوك .مفيش اللى يشغلها . عشان كده كان عندها وقت تنجح وتتفوق .الفيس بوك يا جماعه السرطان اللى انتشر فى عقولنا كلنا و دى حقيقه أيام الامتحانات اللى فاتت الشباب بتوع ثانوى كانوا بينزلوا كوميكس انه كل ما يجي يذاكر يرمى الكتاب ويمسك الموبايل .
البنت اللى استغنت عن السرطان دا..طلعت الاولى على مصر.
6- الصفعه التالته :
مريم وهى بتتكلم 
بتقول انا نفسى اعمل حاجه لبلدى 
فمعتز الدمرداش فكره كلام انشا و هز راسه 
قالتله لا انا مابقولش كلام انشا .
البلد دى اخدت منها مدرسه مجانى وطلعت الاولى.
ولسه البلد دى هاتدينى جامعه ببلاش فلازم لما اتخرج اعمل اللى يساعدها 
دى كانت صدمه بالنسبه لى لما سمعتها بتقول كده
كنت عاوز اقولها اصرخى وقولى كلامك دا لشباب المراهقين الغير قانع وراضى اللى فى نفس سنك اللى شغلتهم انهم يعملوا صفحات كوميكس وسخريه على انستجرام كلها بتدور حوالين الهجره من البلد والبلد الزباله والبلد اللى بتقضي عليهم والبلدى اللى مش بتديهم حاجه .
الكلمتين دول كانت اكبر صفعه على وجه شباب اليومين دول المستهتر
مريم راضية وقانعه بالرغم من انها ليس لديها ربع الى عندهم.
7- اما الصفعه الاخيره … كانت صفعة مريم للمجتمع .
فى الفقره التانيه تم استضافة والد مريم الراجل المحترم .
ذكر نقطه خليتنى مندهش .. وفى نفس الوقت عرفت ان البنت دى بمليون راجل
ابوها قال بنتى تفوقت عشان اتحدت اهلها 
سأله معتز ازاى يعنى
قال له انا فلاح وعندنا فى الفلاحين العزوه بخلفة الرجاله 
وانا عندى 5 بنات فكان دا مش حلو 
مريم وهى فى تالته اعدادى قعدت معايا وقالتلى والله العظيم هاثبتلك انى احسن من مليون ولد واخلى كل الناس تتكلم عنك . وحصل وفى يوم وليله بقيت بطلع على التلفزيون والناس كلها بتتكلم عنى 
8- حاجه بسيطه حصلت محدش اخد باله منها فى اللقاء .
اتصل حد من جريدة الجمهوريه وقالها عاملين ليكي مفاجأه
انتى هاتطلعى مع الاوائل رحله لاوروبا 
ردت البنت قالتله شكرا ..بس مقدرش اوافق قبل ما استشير اهلى .
انا انبسطت ..لانى يوميا بشوف الاصغر منها وهما بيعملوا كل حاجه غلط بدعوى الحريه 
9- اما الحاجه الاخيره دى منى انا مش من مريم .
الناس اللى بتقول التعليم مالوش لازمه وان الشهادات مالهاش لازمه وان المتعلم زى اللى مش متعلم 
انا معاك ان الشغل بشهادتك صعب بس العلم نور مهما اختلف الزمن 
والا ماكانش والد مريم امبارح يقول انا ساكن عندى فى العماره ناس متعلمين .
بصيت ليهم ولكلامهم ومعاملتهم و اخدتهم قدوه ليا 
وحبيت عيالى يطلعوا زيهم .
مريم بنت بمليون راجل .
صدقنى انا كاتب هذه السطور عن نفسى اتمنيت ان تكون عندى مريم.
ومستعد انا فعلا لمساعدتها ليس حتى تتخرج من الجامعة فقط بل حتى افارق الحياة .

 

تعليقك على الموضوع